Venerdì 17 Nov 2017

Poesie di Brotu Ispina già pubblicate

Sa neula

Torrende da unu ‘iazu in continente
dae s’altu appo ‘idu sa ‘idda mia ingabbiada
in unu chelu ‘e nues cumpletamente
chi pariat una nae in mare affungada.

Dae s’’adde però l’appo prontamente
a su maestosu Olimpu assimizada
chi naraian muntagna antigamente
dae sas divinidades frequentada.

Igue s’aunian sos deos cun Zeus in tronu
e detzidian sa sorte ’e ogni mortale
a sos unos fattende carchi donu

e lantende a sos ateros saettas.
Sa neula in bidda mia est abituale
e no bi abitas si no ti l’isettas.

Leggi tutto: Sa neula

Osilesu integrale

Est Brotu Ispina osilesu integrale
ca naschidu est in Osile comente
sos ascendentes chi a memoria ‘e zente
fuin osilesos dae su die nadale.

Lu cunfirman s’uffisciu comunale
cun s’anagrafe ‘e istadu chi est vigente
dae s’unione italiana a su presente
e carchi ‘etzu registru parrocchiale.

Andare pius attesu no est possibile
e chi appat samben de sos invasores
de sa Sardigna no est cosa impossibile.

Ma, umpare a sardu, italianu, europeu,
si sentit unu ‘e sos abitadores
e tzittadinos de su mundu intreu.

Leggi tutto: Osilesu integrale

A Frantziscu Casu

Leggidu cun piaghere ma surpresu
appo sos foglios chi in sas manos mias
has postu cun sas bellas tuas poesias
cumpostas tottu in limbazu osilesu.

Istende tue in Torino, piemontesu
in sa visione mia resurtaias;
ma osservo chi arribadu has sas nadias
costumantzias chi in bidda aias appresu.

Sas rimas tuas abertu m’han sa mente
ammentendemi chi un’amore nou
no iscancellat su ‘etzu fatzilmente

e tue, Frantziscu Casu, sardu ses
ca sempre has sa ‘idda nostra in coro tou
mancari chi in Torino appas sos pes.

Leggi tutto: A Frantziscu Casu

Sas nues

Sas nues chi dae su mare ‘e s’Asinara
bighet su ‘entu a su monte Limbara
s’abbratzan avantzende a sa ‘idda mia
tzertamente ca l’han in simpatia.

Est sa quartina
de Brotu Ispina.

Leggi tutto: Sas nues

Fustesarvos

Sas pittiraccas sun como istradones
e arrivo cun in manos su volante
pro pienare cun s’abba tua bundante,
sana, frisca e gustosa duos bidones.

Cando ivece aia curtos sos cartzones
mi frimmaia passendeche un’istante
e, su licore falende costante,
sas laras b’infundia chei sos puzones.

Puntana ‘e Fustesarvos, ses pro me
unu logu chi hat como sa funtzione
de m’ammentare un’edade finida:

cando mi ‘idias a caddu a s’ainu o a pe
carrende mustu e frutture ‘e istajone
cun babbu meu chi fuit ancora in vida.

Leggi tutto: Fustesarvos

Antares

Antares, ses s’istella mia lughente
e a tie mi so rivolgidu a s’ispissa
cando sa pena battariosa e fissa
chi mi faghiat addoler coro e mente

diventaiat gasi acuta e insistente
chi no podia pensare si no a issa
comente ischiava resa suttammissa
a una padrona dura e prepotente.

T’abbaido e ammento cussas dies passadas
in sa tristura che unu appena ‘essidu
da un’eterna e infinida maladia.

Como mi paret de las aer sonniadas
ma no m’ismentigo chi appo suffridu
e fui in sa mezus zoventude mia.

Leggi tutto: Antares

Sa notiscia noa

Ca sa notiscia chi appo postu in versos
subra s’alligadore est cosa ‘e mannos
e l’han trasmissa canales diversos,
m’iscurten como sos chi han pagos annos.

Est sa continuassione immaginaria,
ca sos omines solu han sa peraula,
tantu grasciosa e rivolussionaria
cantu istruttiva che ogni vera faula.

Creidemi si naro chi sa balla
no boccheit su mischinu alligadore
ca in sa bartza isse no resteit a galla
ma affundeit de improvvisu tottu in suore.

Leggi tutto: Sa notiscia noa

Menu Principale

Work in progress


SITO IN COSTANTE AGGIORNAMENTO

Notizie

Cronaca - La Nuova Sardegna - Sassari

Immagini Casuali

juv.jpg